Skýrsla forseta Bandalags íslenskra listamanna fyrir starfsárið 2025–2026
Lögð fram á aðalfundi 22. mars 2026
Stjórn Bandalags íslenskra listamanna er skipuð formönnum aðildarfélaga BÍL, sem eru sextán talsins. Forseti BÍL er Jóna Hlíf Halldórsdóttir sem var kjörin til tveggja ára kjörtímabils árið 2024.
Stjórn BÍL hefur skipt með sér verkum á árinu þannig að Margrét Tryggvadóttir, formaður Rithöfundasambands Íslands, hefur gegnt starfi ritara og Gunnar Hrafnsson, formaður Félags íslenskra hljómlistarmanna (FÍH), er gjaldkeri. Fjármálastjóri FÍH, Lúðvík Júlíusson, annast hins vegar bókhald BÍL og skil á uppgjöri til endurskoðanda, Helgu Þorsteinsdóttur.
Skoðunarmenn reikninga árið 2025 voru Ragnheiður Tryggvadóttir og Guðmundur Helgason.
Forseti BÍL situr fyrir hönd bandalagsins í Norræna listamannaráðinu, Nordisk Kunstnerråd, og er jafnframt fulltrúi ráðsins í stjórn Circolo Scandinavo.
Eftirfarandi eru aðildarfélög BÍL og formenn þeirra:
1 Arkitektafélag Íslands; AÍ
Formaður: Sigríður Maack
2 Danshöfundafélag Íslands; DFÍ
Formaður: Katrín Gunnarsdóttir
3 Fagfélag Klassískra söngvara á Íslandi; KLASSÍS
Formaður: Þóra Einarsdóttir
4 Félag íslenskra hljómlistarmanna; FÍH
Formaður: Gunnar Hrafnsson
5 Félag íslenskra leikara; FÍL
Formaður: Birna Hafstein
6 Félag íslenskra listdansara; FÍLD
Formaður: Lilja Björk Haraldsdóttir
7 Félag íslenskra tónlistarmanna; FÍT
Formaður: Margrét Hrafnsdóttir
8 Félag kvikmyndagerðarmanna; FK
Formaður: Steingrímur Dúi Másson
9 Félag leikmynda- og búningahöfunda; FLB
Formaður: Eva Signý Berger
10 Félag leikskálda og handritshöfunda; FLH
Formaður: Sveinbjörn Baldvinsson
11 Félag leikstjóra á Íslandi; FLÍ
Formaður. Ólafur Egill Egilsson
12 Félag tónskálda og textahöfunda; FTT
Formaður: Bragi Valdimar Skúlason
13 Rithöfundasamband Íslands; RSÍ
Formaður: Margrét Tryggvadóttir
14 Samband íslenskra myndlistarmanna; SÍM
Formaður: Anna Eyjólfsdóttir
15 Samtök kvikmyndaleikstjóra; SKL
Formaður: Hrönn Sveinsdóttir
16 Tónskáldafélag Íslands; TÍ,
Formaður: Páll Ragnar Pálsson
Inngangur
Starfsár Bandalags íslenskra listamanna 2025–2026 hefur verið viðburðaríkt og einkennst af fjölbreyttum verkefnum sem snúa að stöðu listamanna og menningar í samfélaginu. Í þessari skýrslu er stiklað á stóru um helstu mál sem stjórnin hefur unnið að á árinu, bæði í samtali við stjórnvöld, sveitarfélög og aðra samstarfsaðila.
Stjórn BÍL kom saman ellefu sinnum á árinu. Haldnir voru átta stjórnarfundir auk undirbúningsfundar vegna 100 ára afmælis BÍL sem haldið verður árið 2028, en fundinum stýrði menningarframleiðandinn Ragnheiður Maísól Sturludóttir. Á starfsárinu átti stjórnin einnig samráðsfundi með stjórn listamannalauna, Rannís og starfsfólki í menningarráðuneytinu, auk þriggja vinnufunda með Loga Einarssyni, menningar-, nýsköpunar- og háskólaráðherra. Þá fundaði stjórnin meðal annars með Heiðu Björgu Hilmisdóttur borgarstjóra Reykjavíkur, fulltrúum Hagstofu Íslands, Kristínu Eysteinsdóttur rektor Listaháskóla Íslands og fulltrúum Bandalags háskólamanna og Visku.
Fram undan er mikilvæg vinna hjá stjórn BÍL þar sem sveitarstjórnarkosningar eru í nánd. Stjórnin ætlar á næstu mánuðum að leggja sérstaka áherslu á að setja menningarmál á dagskrá kosninganna. Í því skyni mun BÍL senda spurningalista til framboða þeirra sveitarfélaga sem reka listastofnanir eða standa að menningarstarfsemi, með það að markmiði að fá skýrari sýn á stefnu þeirra og framtíðarsýn í menningarmálum.
Við lifum á tímum mikillar óvissu þar sem heimsmyndin hefur breyst hratt og heldur áfram að breytast nánast dag frá degi. Stríðsátök, útbreiðsla falsfrétta og loftslagsbreytingar hafa áhrif á samfélög um allan heim og setja mark sitt á samfélagsumræðu og stjórnmál. Á slíkum tímum verður hlutverk lista og menningar enn mikilvægara. Listræn tjáning og menning eru grundvallarþættir í opnu og lýðræðislegu samfélagi þar sem tjáningarfrelsi er virt og menningararfur, þar á meðal íslensk tunga, er varðveittur, ræktaður og þróaður.
1. Fundir með Loga Einarssyni menningar-, nýsköpunar- og háskólaráðherra
Á starfsárinu átti stjórn Bandalags íslenskra listamanna þrjá vinnufundi með Loga Einarssyni menningar-, nýsköpunar- og háskólaráðherra, auk eins fundar með starfsfólki ráðuneytisins. Fundirnir voru mikilvægur vettvangur til að ræða stöðu lista og menningar og helstu áskoranir í starfsumhverfi listamanna. Stjórn BÍL lagði áherslu á mikilvægi reglulegs samráðs við ráðherra, enda eru mörg brýn mál sem krefjast áframhaldandi samtals og samvinnu.
Fundirnir reyndust þó erfiðir í skipulagningu og oft var erfitt að fá fundartíma. Þá voru sumir fundanna stuttir og ekki náðist að fara yfir öll þau mál sem BÍL lagði fram til umræðu. Síðasti fundur starfsársins var þó lengdur og gafst þá betra svigrúm til ítarlegri umræðu um málefni listamanna.
Meðal helstu umræðuefna á fundunum var fyrirhuguð endurskipulagning menningarsjóða og möguleg sameining eða samræming umsýslu þeirra. Rætt var um mikilvægi þess að slíkar breytingar tryggi áfram faglega þekkingu innan einstakra listgreina og að möguleg hagræðing skili sér aftur til sjóðanna og listamanna. Stjórn BÍL lagði jafnframt áherslu á að þótt umsýsla yrði samræmd í sameiginlegu kerfi hjá Rannís ætti þjónustan áfram að vera hjá menningarmiðstöðvunum. Slík samræming gæti létt á umsýsluvinnu þeirra og skapað meira svigrúm til að sinna öðrum verkefnum sem hafa beðið vegna manneklu.
Á fundunum var einnig fjallað ítarlega um stöðu listamannalauna og mikilvægi þess að styrkja það kerfi. Stjórn BÍL lagði áherslu á að listamannalaun séu einn mikilvægasti grunnur að sjálfstæðri listsköpun á Íslandi og að nauðsynlegt sé að hækka þau svo þau standi betur undir raunverulegum framfærslukostnaði og launaþróun í landinu. Jafnframt var rætt um nauðsyn þess að bæta starfsumhverfi sjálfstætt starfandi listamanna almennt.
Í því samhengi hefur BÍL bent á þörfina fyrir kerfi sem getur gripið listamenn á milli verkefna, til dæmis með hliðsjón af svokölluðu Alliance-kerfi sem þekkist erlendis. Þá hefur bandalagið einnig lagt áherslu á mikilvægi þess að skoða innleiðingu keðjuábyrgðar í menningarstarfsemi, þannig að opinber fjármögnun og styrkir tryggi að laun og starfskjör listamanna séu í samræmi við eðlileg viðmið.
Á fundunum var jafnframt rætt um stöðu menningarsjóða og nauðsyn þess að efla þá með aukinni fjárfestingu. Stjórn BÍL lagði áherslu á að menningarsjóðir væru mikilvægir innviðir í íslensku menningarlífi og að framlög til margra þeirra dugi ekki til að mæta eftirspurn. Árangurshlutfall umsókna er víða mjög lágt og fjöldi faglega sterkra verkefna fær því ekki stuðning.
Tónlistarsjóður
Á fundunum var bent á að Tónlistarsjóður gegni lykilhlutverki í að efla fjölbreytni og gæði í íslensku tónlistarlífi. Í síðustu úthlutun var árangurshlutfall umsókna aðeins 11%, sem þýðir að langflest faglega sterk verkefni fá engan stuðning. Niðurskurður sjóðsins milli áranna 2025 og 2026 nemur 3,46%. BÍL telur nauðsynlegt að framlag til sjóðsins verði leiðrétt og nemi að lágmarki 235 milljónum króna miðað við launavísitölu.
Kvikmyndasjóður
Einnig var fjallað um stöðu Kvikmyndasjóðs Íslands, sem styður við íslenska kvikmyndagerð og þróun kvikmyndamenningar. Stuðningur úr sjóðnum er oft forsenda þess að aðrir fjárfestar og erlendir meðframleiðendur taki þátt í verkefnum. Þrátt fyrir kvikmyndastefnu stjórnvalda til ársins 2030 er staða sjóðsins áhyggjuefni þar sem óbreytt framlög jafngilda í reynd niðurskurði. BÍL telur nauðsynlegt að framlag til sjóðsins verði að lágmarki 1.650 milljónir króna og að 400 milljónum króna verði bætt við sjónvarpssjóð til að fylgja eftir aðgerðaráætlun stefnunnar.
Bókasafnssjóður höfunda
Á fundunum var einnig rætt um stöðu Bókasafnssjóðs höfunda, sem greiðir höfundum og þýðendum afnotagjöld vegna útlána bóka á bókasöfnum. Sjóðurinn var aukinn árið 2021 þegar samkomulag náðist um greiðslur vegna útlána hjá Hljóðbókasafni Íslands, en niðurskurður í fjárlagafrumvarpi síðan þá var um 22,8%. Niðurskurðurinn hefur sérstaklega áhrif á barnabókahöfunda, þýðendur og höfunda afþreyingarbókmennta. BÍL telur mikilvægt að leiðrétta framlag til sjóðsins þannig að það endurspegli launaþróun en nokkur leiðrétting átti sér þó stað þegar fjárlögin voru samþykkt.
Sviðslistasjóður
Stjórn BÍL vakti einnig athygli á stöðu Sviðslistasjóðs, sem styður við starfsemi atvinnuleikhópa og sjálfstætt starfandi sviðslistafólks. Í síðustu úthlutun bárust 115 umsóknir þar sem sótt var um rúmlega 1,6 milljarð króna, en heildarstuðningur nam aðeins 155 milljónum króna. Árangurshlutfall umsókna var því aðeins 9,68%, sem er langt undir því sem telst eðlilegt í sambærilegum sjóðum. BÍL telur nauðsynlegt að framlag til sjóðsins verði að lágmarki 320 milljónir króna.
Myndlistarsjóður
Á fundunum var einnig rætt um stöðu Myndlistarsjóðs, sem var stofnaður árið 2013 til að efla íslenska myndlist með fjárhagslegum stuðningi við listafólk og stofnanir. Árið 2025 bárust 423 umsóknir en aðeins 109 verkefni fengu styrk. Heildarupphæð umsókna nam 475,8 milljónum króna en úthlutun var aðeins 64 milljónir, sem samsvarar 14% árangurshlutfalli. BÍL telur nauðsynlegt að framlag til sjóðsins verði leiðrétt í samræmi við markmið myndlistarstefnu.
Barnamenningarsjóður Íslands
Loks var rætt um mikilvægi Barnamenningarsjóðs Íslands, sem styður við þátttöku barna og ungmenna í menningu og listum um land allt. BÍL telur mikilvægt að framlag til sjóðsins verði leiðrétt og að það nemi 120 milljónum króna í samræmi við aðgerðaráætlun stjórnvalda.
Að mati BÍL er mikilvægt að koma á reglulegu samráði við ráðherra svo hægt sé að vinna markvisst að því að bæta starfsumhverfi listamanna. Ljóst er að mikil vinna er framundan við að tryggja að listgreinar geti dafnað og að listamenn hafi raunhæf atvinnutækifæri í sínum greinum, fái greitt fyrir störf sín og njóti sanngjarnra launa í samræmi við almenna launaþróun í landinu.
2. Samráðsfundur með Heiðu Björgu Hilmisdóttur, borgarstjóra Reykjavíkur
Þann 14. janúar 2026 átti stjórn Bandalags íslenskra listamanna samráðsfund með Heiðu Björgu Hilmisdóttur borgarstjóra Reykjavíkur. Fundurinn var haldinn á grundvelli samstarfssamnings BÍL og Reykjavíkurborgar, en samkvæmt honum veitir BÍL borginni faglega ráðgjöf í málefnum lista og menningar með það að markmiði að efla fagmennsku í menningarstarfi borgarinnar.
Á fundinum voru rædd fjölmörg málefni sem varða stöðu listamanna og menningarstarfs í Reykjavík. Meðal helstu umræðuefna voru húsnæðismál listamanna og skortur á menningarrýmum í borginni. BÍL kallaði eftir markvissum aðgerðum til að tryggja rými fyrir listsköpun, æfingar, tónleika og sýningar og lagði áherslu á mikilvægi þess að vernda minni tónleikastaði og grasrótarstarfsemi sem hefur átt undir högg að sækja á undanförnum árum.
Einnig var rætt um menningarstefnu Reykjavíkurborgar og þörfina á nýrri aðgerðaráætlun, auk þess sem BÍL vakti athygli á mikilvægi menningarstyrkja borgarinnar og lagði til að styrktarsjóðurinn yrði efldur og fyrirkomulag hans endurskoðað til að auka gagnsæi og fagmennsku í úthlutun. Þá var fjallað um stöðu tónlistarskóla í Reykjavík, þar sem lýst var áhyggjum af niðurskurði og aldurstakmörkunum sem settar hafa verið á nemendur.
Auk þess var rætt um framtíð Korpúlfsstaða sem miðstöðvar listsköpunar, stöðu alþjóðlegrar gestavinnustofu SÍM, eflingu Bókmenntaborgarinnar og Bókmenntavefs Borgarbókasafnsins, skólabókasöfn í grunnskólum borgarinnar og mótun stefnu Reykjavíkurborgar um notkun gervigreindar í stjórnsýslu.
Fundurinn var góður og málefnalegur. Borgarstjóri kom vel undirbúinn til fundarins, tók vel í þau sjónarmið og hugmyndir sem fulltrúar BÍL lögðu fram og átti sér stað uppbyggilegt samtal um stöðu og framtíð menningarmála í borginni.
3. Listamannalaun
Á starfsárinu beitti stjórn BÍL sér fyrir því að upplýsa stjórnvöld og almenning um stöðu listamannalauna og hversu langt þau hafa dregist aftur úr almennri launaþróun. Málefni listamannalauna voru til umræðu á öllum fundum stjórnar BÍL með Loga Einarssyni, menningar-, háskóla- og nýsköpunarráðherra, þar sem lögð var áhersla á mikilvægi þess að endurskoða fjárhæð starfslauna í samræmi við ákvæði laga.
Þann 13. janúar birtist grein eftir forseta BÍL á Vísi, Hvers virði er starfsumhverfi myndlistarmanna?, þar sem fjallað var um stöðu listamannalauna og mikilvægi þess að mánaðarleg greiðsla verði hækkuð. Í greininni var bent á að listamannalaun hafa ekki fylgt almennri launaþróun frá því að úthlutun samkvæmt núgildandi lögum hófst.
Árið 2026 nema listamannalaun 580.000 kr. á mánuði sem verktakagreiðsla, sem jafngildir um 390.000 kr. í launagreiðslu. Hefðu launin fylgt almennri launaþróun ættu þau að nema um 770.000 kr. á mánuði árið 2026. Í 4. gr. laga um listamannalaun segir að fjárhæð starfslauna skuli koma til endurskoðunar við afgreiðslu fjárlaga ár hvert með tilliti til þróunar launa, verðlags og efnahagsmála.
Þann 1. desember 2025 var listamannalaunum fyrir árið 2026 úthlutað og var listamönnum þá tilkynnt um breytingar á bókhaldsmeðferð greiðslnanna. Síðustu ár höfðu listamannalaun verið skráð sem styrkir hjá Fjársýslunni en framvegis verða þær greiðslur skilgreindar og skráðar sem verktakagreiðslur í samræmi við lög.
Listamannalaun eru samkvæmt reglugerð skilgreind sem 66% starf og mega þeir listamenn sem þau hljóta ekki taka að sér launaða vinnu umfram 33% starfshlutfall á meðan starfslaun eru greidd. Listamenn sæta því í reynd takmörkunum á möguleikum til annarrar launaðrar vinnu. Í framkvæmd getur það leitt til þess að listamenn séu tekjulausir hluta árs eða með tekjur undir lágmarkslaunum þá mánuði sem starfslauna nýtur.
Stjórn BÍL telur mikilvægt að ríkið leiðrétti fjárhæð listamannalauna í takt við launaþróun í landinu og að 35% verði bætt ofan á þá fjárhæð til að mæta kostnaði við tryggingargjald og önnur launatengd gjöld. Að mati stjórnar ættu listamannalaun að nema 1.039.500 kr. á mánuði sem verktakagreiðsla, sem væri í samræmi við laun og launaþróun opinberra starfsmanna.
Starfslaun listamanna hafa verið og eru ein mikilvægasta undirstaða menningar og lista á Íslandi. Þau styðja við frumsköpun í landinu og þann samfélagslega ávinning sem af henni hlýst. Starfslaunin eru þannig ekki aðeins stuðningur við einstaka listamenn heldur fjárfesting í menningu og andlegu lífi þjóðarinnar.
4. Stofnun óperu
Mikilvæg tímamót urðu í íslensku menningarlífi þegar Alþingi samþykkti þann 13. júní 2025 frumvarp um stofnun óperu. Með samþykkt laganna er óperulist tryggð sambærileg staða og öðrum sviðslistum í landinu og markaður stöðugur og faglegur grundvöllur fyrir starfsemi óperu á Íslandi.
Bandalag íslenskra listamanna tók þátt í undirbúningsvinnu sem leiddi til lagasetningarinnar og fagnaði stjórn BÍL þeirri niðurstöðu sem mikilvægum áfanga fyrir sviðslistir og tónlistarlíf í landinu. Markmið laganna er að efla óperulist sem grunnstoð í íslensku menningarlífi og skapa henni stöðugt starfsumhverfi, auk þess að tryggja breiðara aðgengi almennings að óperulist um land allt.
Í tilefni af þessum áfanga bauð stjórn BÍL til fagnaðar á Hótel Holti þann 4. september 2025. Þar komu saman listamenn og aðrir sem átt hafa þátt í undirbúningi og þróun málsins á undanförnum árum, meðal annars fulltrúar starfshópa og listamenn sem hafa unnið markvisst að því að gera stofnun óperu að veruleika. Samkvæmt lögunum verður óperustarfsemin rekin sem hluti af Þjóðleikhúsinu og mun hafa aðalaðsetur í Hörpu. Með því fyrirkomulagi er markmiðið að tryggja öflugt faglegt umhverfi fyrir starfsemina og nýta stoðþjónustu og innviði Þjóðleikhússins. Þann 11. janúar 2026 var Finnur Bjarnason skipaður óperustjóri til fimm ára og mun hann leiða uppbyggingu og starfsemi óperunnar á komandi árum.
5. Launaþróun hjá Listaháskóla Íslands
Á árinu beindi stjórn BÍL sjónum að launakjörum listamanna sem starfa við Listaháskóla Íslands, en skólinn er einn stærsti vinnustaður listafólks á Íslandi. Þann 26. maí 2025 sendi stjórn BÍL bréf til Kristínar Eysteinsdóttur, rektors LHÍ, þar sem óskað var eftir upplýsingum um launaþróun hjá starfsfólki skólans undanfarin fimm ár. Óskað var eftir samandreginni tölfræði, án persónuupplýsinga, um laun og launaþróun mismunandi starfsmannahópa, meðal annars fastráðinna kennara, stundakennara, starfsfólks á skrifstofu og verkstæðum, auk upplýsinga um fjölda starfsmanna í hverjum flokki.
Markmið erindisins var að afla gagna sem gætu varpað ljósi á stöðu listamanna sem starfa við LHÍ og stuðlað að málefnalegri umræðu um kjör þeirra.
Í framhaldi af erindinu var stjórn BÍL boðuð á fund með stjórnendum LHÍ þann 7. nóvember 2025 þar sem rætt var um launaþróun og starfsskilyrði innan skólans. Á fundinum kom fram að LHÍ væri næststærsti vinnustaður listamanna á Íslandi, á eftir listamannalaunum, og að mikilvægt væri að afla gagna um launakjör til að meta stöðu listamanna sem starfa við skólann.
Fulltrúar LHÍ fóru yfir forsendur launasetningar við skólann. Fram kom að LHÍ er ekki aðili að kjarasamningi en miðar við kjarasamninga Samtaka atvinnulífsins við Bandalag háskólamanna fyrir akademískt starfsfólk. Launastefna skólans byggir meðal annars á flokkun starfa, mannauðsstefnu og jafnlaunavottun, og samkvæmt stjórnendum LHÍ hefur jafnlaunagreining skólans komið vel út frá upphafi.
Einnig kom fram að launasetning akademísks starfsfólks við LHÍ byggir fyrst og fremst á viðmiðum háskólakennslu en ekki sérstaklega á störfum í listum og skapandi greinum. Á fundinum voru kynntar niðurstöður greiningar á launum og launaþróun mismunandi starfsmannahópa á árunum 2020–2025. Þar voru meðal annars skoðaðir kennarar með listrænan bakgrunn, starfsfólk stoðsviða, starfsfólk verkstæða og stjórnendur. Samkvæmt kynningu LHÍ voru meðallaun starfsfólks með listrænan bakgrunn, bæði kennara og stjórnenda, hærri en hjá öðrum starfsmannahópum innan skólans. Engar nákvæmar launatölur fylgdu þó kynningunni, að undanskildum tímataxta stundakennara.
Þá kom fram að laun stundakennara hefðu hækkað um 22,5% á tímabilinu og að tímataxti þeirra væri sambærilegur við taxta hjá Háskóla Íslands. Stundakennarar geta valið hvort þeir starfa sem launþegar eða verktakar, en verktakagreiðslur bera 17,85% álag til að mæta kostnaði við lífeyrissjóðsframlag og tryggingagjald.
Í kjölfar fundarins átti stjórn BÍL samráðsfund með fulltrúum Visku þar sem farið var yfir stöðu mála og rætt um næstu skref. Þar komu fram áhyggjur af stöðu stundakennara, meðal annars varðandi umfang undirbúningsvinnu sem ekki er alltaf metin til launa, auk þess sem bent var á að verktakagreiðslur endurspegli ekki að fullu þann kostnað sem fylgir slíku fyrirkomulagi. Þá var einnig rætt um starfstíma kennara við LHÍ, starfsmannaveltu og mikilvægi þess að afla frekari gagna um laun og launaþróun hjá starfsfólki skólans. Fulltrúar Visku munu í framhaldinu vinna að frekari gagnaöflun og greiningu á launastöðu starfsfólks LHÍ. Stefnt er að áframhaldandi samráði við stjórnendur skólans þegar niðurstöður þeirrar vinnu liggja fyrir.
6. Launaþróun myndlistarmanna á opinberum listasöfnum í eigu ríkis og sveitarfélaga og safna sem eru listamannarekin eða í eigu stéttarfélags.
Á starfsárinu leiddi Samband íslenskra myndlistarmanna vinnu við að greina launaþróun myndlistarmanna á opinberum listasöfnum á Íslandi. Bandalag íslenskra listamanna og félagsnet myndlistarmanna innan vébanda Visku komu að verkefninu til aðstoðar og veittu m.a. ráðgjöf í vinnunni. Að frumkvæði SÍM var kallað eftir upplýsingum frá söfnunum um greiðslur til myndlistarmanna síðastliðin þrjú ár.
Niðurstöðurnar sýndu að brýn þörf var á að fara yfir stöðuna. Í ljós kom meðal annars að sum söfn höfðu ekki hækkað taxta sína í samræmi við samþykktar verklagsreglur þar sem kveðið er á um að greiða skuli samkvæmt taxta SÍM. Þar má nefna Gerðarsafn, Hafnarborg og Listasafnið á Akureyri sem höfðu ekki uppfært greiðslur frá því að greiðslur hófust. Í sumum tilvikum höfðu söfn greitt allt að 6.000 krónur á tímann, sem er um helmingi lægra en gildandi taxti SÍM. Þá kom einnig fram að sum söfn hafa sett tímaþak á vinnuframlag myndlistarmanna, allt að átta klukkustundir, óháð raunverulegu umfangi vinnunnar.
Greiningin sýndi einnig að tímataxti myndlistarmanna er almennt lægri en hjá öðrum sambærilegum fagstéttum innan skapandi greina. Tímataxti samkvæmt taxta SÍM árið 2026 er 12.882 krónur á klukkustund, sem er verktakagreiðsla. Til samanburðar má nefna að tímataxti tónlistarkennara samkvæmt FÍT er um 17.744 krónur, tímataxti leikara samkvæmt samningi við RÚV getur verið um 20.636 krónur (miðavið leikara með meðal starfsreynslu) og tímataxti arkitekta samkvæmt Arkitektafélagi Íslands um 25.000 krónur á klukkustund.
Næstu skref í þessari vinnu eru í höndum SÍM í samstarfi við BÍL og aðra hagaðila. Þau söfn sem ekki hafa fjármagn til að greiða samkvæmt gildandi verklagsreglum þurfa að óska eftir auknu fjármagni frá eigendum safnanna svo unnt sé að standa við samþykktar greiðslur. Markmiðið er að öll opinber listasöfn á Íslandi greiði myndlistarmönnum samkvæmt taxta SÍM eigi síðar en árið 2027.
7. Atvinnustefna Íslands til ársins 2035
Stjórn Bandalag íslenskra listamanna sendi þann 26. ágúst 2025 umsögn í samráðsgátt stjórnvalda um fyrirhugaða atvinnustefnu Íslands til ársins 2035. Í umsögninni fagnaði stjórn BÍL þeirri ákvörðun stjórnvalda að móta heildstæða atvinnustefnu til lengri tíma, en lagði jafnframt áherslu á mikilvægi þess að listir og menning verði viðurkenndar sem sjálfstæður og vaxandi atvinnuvegur innan íslensks efnahagslífs.
Í umsögninni benti stjórn BÍL á að menning og skapandi greinar séu ekki aðeins mikilvægur þáttur í samfélagslegri velferð heldur einnig raunverulegur efnahagslegur drifkraftur. Vísað var til skýrslunnar Framlag menningar og skapandi greina til verðmætasköpunar á Íslandi, sem unnin var fyrir menningar- og viðskiptaráðuneytið, þar sem fram kemur að beint framlag menningar og skapandi greina til landsframleiðslu nam 3,5% eða um 150 milljörðum króna árið 2022. Að mati BÍL ætti atvinnustefna stjórnvalda að endurspegla þá staðreynd að listir og menning séu atvinnugreinar til jafns við aðrar og hafi bæði efnahagslegt og samfélagslegt gildi.
Stjórn BÍL lagði einnig áherslu á að fjárfesting í listum og skapandi greinum sé ein áhrifaríkasta leiðin til að efla verðmætasköpun til lengri tíma. Í því samhengi var bent á mikilvægi þess að efla menningarmiðstöðvar á borð við Miðstöð íslenskra bókmennta, Kvikmyndamiðstöð Íslands, Sviðslistamiðstöð Íslands, Myndlistarmiðstöð, Tónlistarmiðstöð og Miðstöð hönnunar og arkitektúrs, auk þess að styrkja starfslaunasjóði listamanna. Slíkar aðgerðir styðji við frumsköpun, auki útflutningsmöguleika íslenskrar listar og skapi alþjóðleg verðmæti sem skili sér margfalt til baka til samfélagsins.
Í umsögninni var jafnframt bent á að skapandi greinar búi yfir verulegum vaxtarmöguleikum og að loftslagsáhrif listgreina séu almennt takmörkuð. Á sama tíma standi ríki og sveitarfélög að mati BÍL frammi fyrir ákveðinni innviðaskuld gagnvart listum og skapandi greinum. Til að þær geti dafnað þurfi listamenn aðgang að rými, tíma og fjárfestingu til sköpunar, enda skili slík fjárfesting sér margfalt til samfélagsins bæði efnahagslega og menningarlega.
Stjórn BÍL fylgdi umsögninni eftir á fundi með Loga Einarssyni þann 13. mars 2026 þar sem rætt var um hlutverk lista og skapandi greina í framtíðaratvinnustefnu landsins. Stjórn BÍL vonast til að fá að taka þátt í áframhaldandi vinnu við mótun stefnunnar.
8. Hagstofan
Í febrúar 2026 funduðu fulltrúar BÍL með Hagstofu Íslands um samstarf aðila á grundvelli samstarfssamnings frá árinu 2022. Samningurinn er mikilvægur fyrir BÍL þar sem hann skapar grundvöll fyrir vinnslu hagtalna um kjör og starfsaðstæður listamanna á Íslandi. Á fundinum var farið yfir fyrirkomulag gagnaskila og samþykkt að BÍL skili inn kennitölum félagsmanna í CSV-formi fyrir tímabilið 2025–2026 til úrvinnslu hjá Hagstofunni.
Fram undan er frekara samstarf um úrvinnslu og greiningu gagna þar sem BÍL mun óska eftir þátttöku BHM, Visku og Rannsóknaseturs skapandi greina. Markmiðið er að leggja grunn að heildstæðri könnun sem kortleggur efnahag, starfsaðstæður og lífskjör listamanna, meðal annars með greiningu á tekjum, atvinnumynstri og félagslegri stöðu. Einnig var rætt um að skoða lífeyrisréttindi listafólks, sem gætu varpað skýrara ljósi á þá stöðu sem BÍL hefur bent á um að lífskjör margra listamanna séu ótrygg og undir meðallagi. Sambærilegar rannsóknir hafa verið framkvæmdar erlendis og geta slíkar kannanir haft mikil áhrif á mótun menningarstefnu og umræðu um kjör listafólks. Stefnt er að frekari fundum með Hagstofunni á árinu til að fylgja verkefninu eftir.
9. Inngildingarstefna BÍL
Á aðalfundi Bandalags íslenskra listamanna þann 16. mars 2024 voru kynnt drög að inngildingarstefnu BÍL sem Eva Signý Berger og Lilja Björk Haraldsdóttir unnu að. Vinnan við stefnuna hélt áfram á starfsárinu í samráði við fleiri ráðgjafa og hagaðila og er hún nú tilbúin til samþykktar. Gert er ráð fyrir að stefnan verði tekin til afgreiðslu á aðalfundi BÍL sem haldinn er í dag, 22. mars 2026.
Tilgangur stefnunnar er að stuðla að auknu aðgengi, jafnræði og inngildingu innan íslensks listalífs. BÍL leggur áherslu á að listalíf sem endurspeglar ekki fjölbreytileika samfélagsins sé ekki fullburða lýðræðislegt rými og að mikilvægt sé að greina og ryðja úr vegi kerfisbundnum hindrunum sem geta takmarkað þátttöku í listalífi og menningarstarfi.
Í stefnunni er lögð áhersla á þrjú meginviðfangsefni. Í fyrsta lagi að tilnefningar BÍL í nefndir, ráð og stjórnir endurspegli fjölbreytileika íslensks listalífs og stuðli að jafnræði í ákvarðanatöku. Í öðru lagi að starfshættir bandalagsins byggist á gagnsæi, aðgengi og inngildingu þannig að upplýsingar, tækifæri og þátttaka séu öllum aðgengileg. Í þriðja lagi að BÍL beiti áhrifum sínum í menningarpólitísku samhengi til að stuðla að auknu jafnræði og fjölbreytileika í íslensku listalífi.
Til að hrinda stefnunni í framkvæmd hefur BÍL jafnframt mótað þriggja ára aðgerðaáætlun. Þar er meðal annars gert ráð fyrir að þróa mælikvarða sem varpa ljósi á aðgengi og fjölbreytileika í tilnefningum bandalagsins, setja á fót ráðgjafahóp um inngildingu og aðgengi og innleiða verklagsreglur sem tryggja að inngilding og jafnræði séu höfð að leiðarljósi í starfsemi BÍL.
Með inngildingarstefnunni skuldbindur BÍL sig til að vinna markvisst að því að auka aðgengi að tækifærum og áhrifum innan listalífsins og stuðla að því að íslenskt listalíf endurspegli með skýrari hætti fjölbreytileika samfélagsins.
10. Tilmæli BÍL um notkun gervigreindar
Á starfsárinu vann Bandalag íslenskra listamanna að gerð tilmæla um notkun gervigreindar í skapandi greinum. Tilmælin byggja á fyrirmynd frá sænsku regnhlífarsamtökunum KLYS – Samlad röst för Sveriges yrkesverksamma kulturskapare, sem veittu BÍL leyfi til að þýða og aðlaga tilmælin að íslenskum aðstæðum.
Stjórn BÍL skipaði vinnuhóp um verkefnið sem samanstendur af forseta BÍL, Hlyni Helgassyni, Gunnari Hrafnssyni og Sveinbirni Baldvinssyni. Sveinbjörn Baldvinsson þýddi upphaflega texta sænsku tilmælanna og í framhaldinu réð BÍL Sigríði Hagalín Björnsdóttur til að endurvinna textann og laga hann að skýrari og aðgengilegri íslensku.
Tilmælin eru ætluð stjórnvöldum, opinberum stofnunum og fyrirtækjum sem nýta gervigreind við framleiðslu eða miðlun efnis. Markmið þeirra er að stuðla að ábyrgri notkun gervigreindar sem virðir höfundarétt listamanna og verndar forsendur mannlegrar sköpunar. Í tilmælunum er meðal annars lögð áhersla á að virða höfundarétt, tryggja gagnsæi um notkun gervigreindar og forðast að nota gervigreind á þann hátt að hún grafi undan störfum starfandi höfunda og listamanna.
Ákveðið var að birta tilmælin í tveimur útgáfum; annars vegar styttri útgáfu þar sem helstu meginreglur eru settar fram á hnitmiðaðan hátt og hins vegar lengri útgáfu með ítarlegri leiðbeiningum sem stofnanir, fyrirtæki og fagfélög geta nýtt sér í eigin starfsemi. Stefnt er að því að fá Brandenburg sköpunarstofu til að hanna rafrænan bækling með tilmælunum sem verður birtur á heimasíðu BÍL þegar vinnu við textann er lokið.
11. Staða tónlistarmenntunar á Íslandi.
Í nóvember 2025 sendi Bandalag íslenskra listamanna frá sér ályktun um stöðu tónlistarmenntunar á Íslandi ásamt fjölda fagfélaga og hagaðila á sviði tónlistar og tónlistarmenntunar. Ályktunin var send stjórnvöldum, sveitarfélögum og menntastofnunum með það að markmiði að vekja athygli á þróun síðustu ára sem bendir til þess að staða tónlistarmenntunar sé að veikjast bæði innan tónlistarskóla og í almennu skólakerfi landsins.
Í ályktuninni er meðal annars kallað eftir því að stjórnvöld hefji vinnu við rammalöggjöf um listfræðslu í samræmi við menntastefnu stjórnvalda til ársins 2030 og tryggi þannig skýra stefnu og jafnt aðgengi að tónlistarnámi. Þá er bent á að útgáfa nýrrar aðalnámskrár tónlistarskóla hafi tafist og að nauðsynlegt sé að bæta úr því.
Ályktunin fjallar einnig um fjármögnun tónlistarskóla og bendir á að niðurskurður undanfarinna ára hafi haft áhrif á aðgengi að námi og framboð kennslu. Þá er vakin athygli á skorti á tónlistarkennurum og mikilvægi þess að styrkja menntun þeirra við Listaháskóla Íslands.
Jafnframt er bent á að kennsla í söng og tónmennt í grunnskólum hafi víða dregist saman. Hagaðilar kalla eftir endurreisn tónmenntar sem lykilþáttar í skólastarfi og leggja áherslu á mikilvægi þess að tryggja sterkari stoðir tónlistarmenntunar á öllum skólastigum.
Stjórn BÍL mun áfram beita sér fyrir því að þessi mál verði tekin til úrbóta og mun halda áfram að þrýsta á bæði Reykjavíkurborg og ríkið að vinna markvisst að því að styrkja tónlistarmenntun og fjárfesta í öflugu tónlistarskólakerfi um land allt. Slík fjárfesting er grundvöllur fyrir áframhaldandi þróun íslensks tónlistarlífs og mikilvægt framlag til menningar, sköpunar og samfélagslegrar velferðar til framtíðar.
12. Alþjóðlegt samstarf
Á starfsárinu lagði Bandalag íslenskra listamanna áfram áherslu á virkt samstarf við norræn systursamtök og þátttöku í alþjóðlegum vettvangi sem snerta stöðu listamanna og menningar. Slíkt samstarf er mikilvægt til að styrkja sameiginleg sjónarmið og vinna að sameiginlegum áskorunum sem snerta listafólk á Norðurlöndum.
Eitt mikilvægasta samstarf BÍL á alþjóðavettvangi er þátttaka í Nordisk Kulturråd, samstarfsvettvangi listamannasamtaka frá Norðurlöndunum. Þar koma saman fulltrúar listamannasamtaka frá Danmörku, Finnlandi, Íslandi, Noregi og Svíþjóð, auk fulltrúa frá Færeyjum, Grænlandi og Sámi-listamannaráðinu. Markmið ráðsins er að efla samstarf listamannasamtaka á Norðurlöndum og vinna sameiginlega að málefnum sem snerta starfsskilyrði listafólks og menningarstefnu á alþjóðavettvangi. Stefnt er að næsta fundi ráðsins í lok apríl í Grænlandi þar sem fulltrúar samtakanna munu ræða stöðu listamanna og menningar í breyttu alþjóðlegu samhengi.
Í mars 2026 sendi ráðið frá sér sameiginlega stuðningsyfirlýsingu til listafólks í Grænlandi. Í yfirlýsingunni lýstu norræn listamannasamtök yfir eindreginni samstöðu með grænlensku listafólki á tímum pólitískrar óvissu og aukins ytri þrýstings um framtíð landsins. Þar var lögð áhersla á að listræn tjáning og menning séu grundvallarþættir sjálfsákvörðunarréttar, lýðræðis og mannlegrar reisnar. Jafnframt var bent á að grænlensk menning, tungumál og listræn hefð væru lifandi tjáning samfélags sem ætti rétt á að móta eigin framtíð. Norræn listamannasamtök lýstu jafnframt yfir stuðningi við listrænt frelsi, tjáningarfrelsi, menningarlegt sjálfræði og rétt listamanna til að starfa án pólitísks þrýstings eða utanaðkomandi afskipta.
Á tímum þar sem stríð, aukin spenna í alþjóðamálum og einræðisherrar ógna lýðræðislegum gildum hefur samstarf listamannasamtaka á Norðurlöndum aldrei verið mikilvægara. Samstaða og samtal á milli landa styrkir rödd listafólks og skapar vettvang til að verja þau gildi sem listir og menning byggja á.
Forseti BÍL situr í stjórn Circolo Scandinavo fyrir hönd Nordisk Kulturråd,Gestavinnustofu í Róm sem hefur um áratuga skeið verið mikilvægur vettvangur fyrir listafólk frá Norðurlöndunum. Þar hafa listamenn getað dvalið og unnið að verkefnum sínum í allt að þrjá mánuði í senn. Á undanförnum árum hefur starfsemi Circolo verið í endurskipulagningu eftir áhrif Covid-faraldursins og niðurskurð sem starfsemin varð fyrir á sama tíma frá Norrænu ráðherranefndinni. Unnið hefur verið að því að efla starfsemina á ný, meðal annars með endurnýjun heimasíðu og fleira Gestavinnustofan gegnir mikilvægu hlutverki fyrir norrænt menningarsamstarf þar sem listamenn frá ólíkum löndum hittast, mynda tengslanet og þróa ný samstarfsverkefni. Þörfin fyrir slíkt samtal og samstarf hefur sjaldan verið meiri en á þessum tímum þar sem lýðræðisleg gildi standa víða frammi fyrir áskorunum.
BÍL leggur mikla áherslu á að vera í góðu og virku samtali við systursamtök á Norðurlöndum. Með slíku samstarfi getum við unnið saman að stórum sameiginlegum verkefnum, meðal annars varðandi höfundarrétt, áhrif gervigreindar á listir og menningu, umhverfismál og mikilvægi þess að verja lýðræðisleg gildi í samfélaginu.
13. Samstaða með Palestínu – Þjóð gegn þjóðarmorði
Á starfsárinu lét Bandalag íslenskra listamanna sig einnig varða alþjóðleg mannréttindamál og tók þátt í breiðfylkingu félagasamtaka sem standa saman í samstöðu með palestínsku þjóðinni. BÍL tók þátt í undirbúningi og stuðningi við fjöldafund sem haldinn var í Reykjavík þar sem kallað var eftir tafarlausu vopnahléi og aðgerðum til að stöðva ofbeldi og mannfall meðal almennra borgara í Palestínu. Fundurinn var hluti af stærri samstöðuaðgerðum sem fjölmörg verkalýðsfélög, mannréttindasamtök og félagasamtök komu að í sameiningu.
Fundurinn markaði mikilvægt augnablik í íslenskri samfélagsumræðu þar sem fjöldi fólks kom saman til að lýsa yfir samstöðu með almennum borgurum í Gaza og kalla eftir því að stjórnvöld gripu til aðgerða til að stuðla að friði og virðingu fyrir alþjóðalögum.
BÍL leggur áherslu á að listir og menning gegni mikilvægu hlutverki í að standa vörð um mannréttindi, frelsi og mannlega reisn. Þegar slíkar grundvallarreglur eru brotnar er mikilvægt að listafólk og samtök þeirra láti í sér heyra og taki þátt í samfélagslegri umræðu.
14. Hugmyndafundur vegna 100 ára afmælis BÍL
Þann 31. október 2025 hélt Bandalag íslenskra listamanna vinnufund í Hannesarholti til að hefja undirbúning fyrir 100 ára afmæli BÍL árið 2028. Fundinum stýrði menningarframleiðandinn Ragnheiður Maísól Sturludóttir sem einnig tók saman ítarlega skýrslu um niðurstöður hans. Um tuttugu og tveir þátttakendur sátu fundinn, þar á meðal stjórn BÍL, aðrir stjórnarmenn úr fagfélögunum og listamenn. Markmið fundarins var að safna hugmyndum og móta fyrstu sýn á afmælisárið.
Í umræðum kom fram að BÍL gegnir mikilvægu hlutverki sem sameiningarvettvangur listamanna þvert á listgreinar og sem sameiginlegt þrýstiafl gagnvart stjórnvöldum. Jafnframt var rætt um framtíðarsýn bandalagsins og bent var á mikilvægi þess að styrkja innviði BÍL, meðal annars með ráðningu framkvæmdastjóra og því að tryggja bandalaginu skrifstofuaðstöðu.
Fjölbreyttar hugmyndir komu fram um viðburði og verkefni á afmælisárinu. Þar á meðal var rætt um stóran sameiginlegan afmælisviðburð 6. september 2028 þar sem allar listgreinar kæmu saman í fjölbreyttri dagskrá. Einnig voru ræddar hugmyndir um málþing, greinaskrif og miðlun í fjölmiðlum sem varpa ljósi á sögu BÍL og mikilvægi lista fyrir samfélagið. Þá var lögð áhersla á víðtækt samstarf fagfélaga og menningarstofnana og að viðburðir nái til landsins alls.
Næstu skref í undirbúningi afmælisársins eru að vinna frekar úr hugmyndunum sem fram komu á fundinum og ákveða hvaða verkefni verða framkvæmd. Einnig stendur til að funda með stjórnendum listastofnana landsins um mögulegt samstarf og sækja um styrki til ráðuneytisins vegna undirbúnings og framkvæmdar verkefna.
15. Niðurlag
Annað starfsár mitt sem forseti BÍL var bæði lærdómsríkt og viðburðaríkt, með skemmtilegum og krefjandi verkefnum. Eitt af mörgu sem stendur upp úr er ráðstefnan Nordiskt kulturforum, sem haldin var 17.–18. júní í Sveaborg í Helsinki. Ég sem forseti BÍL tók þátt í pallborðsumræðum um starfsskilyrði listafólks á Norðurlöndum ásamt fulltrúum listamannasamtaka frá öðrum norrænum löndum. Á vettvangi málþingsins gafst tækifæri til að ræða sameiginlegar áskoranir í menningarstefnu og miðla sjónarmiðum íslenskra listamanna í norrænu samhengi.
Á starfsárinu lagði forseti BÍL áherslu á að bandalagið tæki virkan þátt í opinberri umræðu um stöðu listamanna og menningar með greinaskrifum fyrir hönd bandalagsins. Meðal annars var svarað gagnrýni Samtaka skattgreiðenda á starfslaun listamanna, sem byggðist á rangri og villandi framsetningu gagna. Í greininni var lögð áhersla á mikilvægi listamannalauna sem undirstöðu fyrir sjálfbæra listsköpun og sem fjárfestingu í menningu, lýðræði og samfélagslegri þróun.
Forseti BÍL skrifaði einnig grein þar sem fjallað var um skort á rýmum fyrir listsköpun í Reykjavík og mikilvægi þess að borgin tryggi listafólki aðgang að vinnustofum, æfingarýmum, tónleikastöðum og sýningarrýmum. Bent var á að slík rými séu grundvallarinnviðir menningarlífsins og forsenda þess að listafólk geti þróað verk sín og starfað. Í annarri grein var sjónum beint að starfsumhverfi myndlistarmanna og þeim kerfislægu áskorunum sem margir listamenn standa frammi fyrir, þar á meðal ótryggum tekjum, skorti á stuðningskerfum og takmörkuðum fjármunum sjóðanna. Þar var jafnframt bent á mikilvægi þess að fjárfesta í listum og menningu sem atvinnugrein og samfélagslegum verðmætum.
Það er mikilvægt að forseti BÍL taki virkan þátt í opinberri umræðu um stöðu listamanna og menningar í samfélaginu. Með greinaskrifum og þátttöku í umræðu getum við haft áhrif, sett málefni listafólks á dagskrá og komið mikilvægum sjónarmiðum á framfæri við stjórnvöld og almenning. Slík þátttaka er mikilvæg til að styrkja stöðu listamanna og tryggja að listir og menning fái þann sess í samfélaginu sem þær eiga skilið.
Ég þakka núverandi stjórn fyrir samstarfið á árinu.
Fulltrúar BÍL í nefndum og ráðum 2025– 2026
Menningar og íþróttasvið Reykjavíkur
Áheyrnarfulltrúi Jóna Hlíf Halldórsdóttir
Varamaður Anna Eyjólfsdóttir
Fulltrúar í faghópi um styrki Menningar- íþrótta- og tómstundaráðs fyrir 2024
Aðalmaður: Gunnar Andreas Kristinsson
Varamaður: Sólveig Arnarsdóttir
Aðalmaður: Helga Óskarsdóttir,
Varamaður: Starkaður Sigurðarson
Aðalmaður: Jóna Hlíf Halldórsdóttir
Varamaður: Bergur Ebbi Benediktsson
Aðalmaður: Hanna Björk Valsdóttir
Varamaður: Steingrímur Dúi Másson
Kvikmyndaráð
Drífa Freyju-Ármannsdóttir
Varamaður: Benedikt Erlingsson
Fulltrúaráð Listahátíðar
Jóna Hlíf Halldórsdóttir
Varamaður: Margrét Örnólfsdóttir
Stjórn listamannalauna (2024–2027)
Kolbrún Ýr Einarsdóttir
Varamaður: Erling Jóhannesson
Stjórn Skaftfells
Anna Eyjólfsdóttir
Varamaður: Jóna Hlíf Halldórsdóttir
Fagráð Íslandsstofu í listum og skapandi greinum
Jóna Hlíf Halldórsdóttir
Menningarfána verkefni Reykjavíkurborgar
Karen María Jónsdóttir
List án landamæra
Margrét Pétursdóttir
Varamaður: Jóna Hlíf Halldórsdóttir
Stjórn Gljúfrasteins
Hafliði Arngrímsson
Varamaður: Jóna Hlíf Halldórsdóttir
Fagráð Sláturhússins á Egilsstöðum
Wioleta Anna Ujazdowska
Umsagnarnefnd vegna heiðurslauna Alþingis
Páll Baldvin Baldvinsson
Varamaður: Þórunn Gréta Sigurðardóttir
Höfundarréttarráð (2025–2028)
Mikael Lind
Varamaður: Margrét Tryggvadóttir
Samstarfshópur um sóknaráætlun höfuðborgarsvæðisins
Jóna Hlíf Halldórsdóttir
Barnamenningarmiðstöð
Felix Bergsson
Varamaður: Sigyn Blöndal
Samráðshópur List fyrir alla
Felix Bergsson og Hildur Steinþórsdóttir
Austurbrú – fagráð menningar
Hlín Pétursdóttir Behrens
Menningarfagráð Uppbyggingarsjóðs Vesturlands
Eirún Sigurðardóttir
Fulltrúi BÍL í sjálfbærniráði
Erling Jóhannesson,
Varamaður: Sigríður Rósa Bjarnadóttir
Valnefnd Kjarvalsstofu í París
Erling Klingenberg
Varamaður: Bergrún Snæbjörnsdóttir
Menningarsjóður Guðjóns Samúelssonar
Erling Jóhannesson
Starfshópur sem skoðar leiðir til þess að auka þátttöku fatlaðs fólks í menningarlífi, bæði hvað varðar aðgengi að listum og menningu og listsköpun
Helga Rakel Rafnsdóttir
Varamaður: Þórður Högnason