Bandalag íslenskra listamanna, skammstafað BÍL, er bandalag fagfélaga listamanna í hinum ýmsu listgreinum og er tilgangur þess fyrst og fremst að styðja vöxt og viðgang íslenskra lista, bæði innanlands og utan, gæta hagsmuna íslenskra listamanna og efla með þeim samvinnu og samstöðu. Aðild að BÍL geta þau félög listamanna átt sem starfa á atvinnugrundvelli að listsköpun og listflutningi og eru formenn þeirra sjálfkjörnir í stjórn BÍL. Að örðu leyti vísast til laga BÍL um málefni bandalagsins.

Forseti er kjörinn til tveggja ára í senn og er hann talsmaður stjórnar og kemur fram fyrir hennar hönd út á við og gagnvart stjórnvöldum. Stjórn BÍL skipar fulltrúa listamanna í ýmis ráð og nefndir á vegum ríkis og borgar, auk þess sem hún er umsagnaraðili fyrir stjórnvöld um flest þau mál er snerta listir og menningu.

Stjórn BÍL skiptir þannig með sér verkum að Margrét Tryggvadóttir  formaður Rithöfundasamabandsins gegnir starfi ritara og Gunnar Hrafnsson formaður Félags íslenskra hljómlistamanna – FÍH er gjaldkeri. Það er hins vegar fjármálastjóri FÍH, Lúðvík Júlíusson sem annast bókhald BÍL og skil á uppgjöri til endurskoðanda Helgu Þorsteinsdóttur. Skoðunarmenn reikninga eru Ragnheiður Tryggvadóttir og Sigurgeir Sigmundsson

Starfandi forseti er Jóna Hlíf Halldórsdóttir,
kosin á aðalfundi 16. mars 2024 og endurkjörin 22. mars 2026

Forseti BÍL er í stjórn Nordisk Kunstnerråd

Nordisk Kunstnerråd er samstarfsvettvangur listamannasamtaka á Norðurlöndum og norðurslóðum. Markmið ráðsins er að efla samstarf listafólks þvert á landamæri, standa vörð um listrænt frelsi og bæta starfsumhverfi listamanna. Í starfi ráðsins er lögð áhersla á menningarstefnu, höfundarétt, sanngjörn starfsskilyrði og mikilvægi lista og menningar í opnu og lýðræðislegu samfélagi. Með samstarfi sínu leitast aðildarsamtökin við að styrkja stöðu listafólks og tryggja að rödd þess heyrist í samfélagslegri umræðu og stefnumótun.

Aðildarsamtök Nordisk Kunstnerråd eru:

KLYS – Konstnärliga och Litterära Yrkesutövares Samarbetsnämnd í Svíþjóð,
Dansk Kunstnerråd í Danmörku,
Forum Artis í Finnlandi,
Sami Artist Council í Sápmi, Kunstnernettverket í Noregi,
LISA – Listafólkasamtøk Føroya í Færeyjum og EPI – Eqqumiitsuliornermik Pinngorartitsisut Ingerlatsisullu á Grænlandi
Bandalag íslenskra listamanna á Íslandi.

Saman mynda þessi samtök öflugan vettvang norræns listafólks þar sem áhersla er lögð á samstöðu, menningarsamstarf og vernd menningarlegrar fjölbreytni á Norðurlöndum og norðurslóðum.

Nordisk Kunstnerråd á einnig fulltrúa í stjórn Circolo Scandinavo í Róm, sem er ein elsta norræna menningarstofnun utan Norðurlanda. Circolo Scandinavo var stofnað árið 1860 sem samstarfsvettvangur norrænna listamanna og fræðimanna í Róm og hefur frá því gegnt mikilvægu hlutverki í menningarsamskiptum Norðurlanda og Ítalíu. Í dag rekur Circolo alþjóðlega gestavinnustofu fyrir listafólk og menningarfólk frá Norðurlöndum þar sem lögð er áhersla á listrannsóknir, samstarf og menningarskipti. Þar hafa fjölmargir þekktir norrænir höfundar og listamenn dvalið og starfað í gegnum tíðina

Sjá heimasíðu Circolo Scandinavo HÉR

Bandalag íslenskra listamanna, BÍL
Lindargata 6
101 Reykjavík
sími: 6630545
netfang: bil@bil.is
kennitala: 440169-2959