Bandalag íslenskra listamanna, í samstarfi við Samtök tónlistarskóla í Reykjavík og fulltrúa listdansskóla á höfuðborgarsvæðinu, stendur fyrir opnum fundi og pallborðsumræðum um stöðu og framtíð lista, listmenntunar og menningar í Reykjavík.

Fundarstjóri er Friðþjófur Þorsteinsson, sviðslistahönnuður og ráðgjafi.

Fundurinn fer fram í Tjarnarbíói laugardaginn 9. maí kl. 14:00–16:00 og eru allir velkomnir.Á fundinum verður rætt við frambjóðendur allra flokka um framtíð menningar í Reykjavík og stefnu flokka þeirra í menningarmálum. Sérstök áhersla verður lögð á að Reykjavík sé borg þar sem listafólk vill búa og starfa, og að listmenntun sé tryggð með jöfnu aðgengi fyrir alla.

Við köllum eftir sjónarmiðum frambjóðenda um framtíð menningar, m.a. aðgengi að rýmum fyrir listsköpun, æfingar og viðburði, þróun bókasafna, jafnt aðgengi að menningu, gagnsæja og faglega úthlutun styrkja og sanngjarna greiðslu til listafólks.

Einnig verður fjallað um áhrif gervigreindar, listkennslu – þar á meðal tónlistar- og danskennslu – og jafna möguleika til þátttöku.

Hér gefst mikilvægt tækifæri til opins samtals þar sem listafólk getur komið sjónarmiðum sínum á framfæri, spurt frambjóðendur allra flokka og haft áhrif á mótun framtíðar menningarlífs í Reykjavík.

Við hlökkum til að sjá ykkur.

Sjá Facebook viðburð HÉR

Dagskrá
14:00 – Jóna Hlíf Halldórsdóttir, forseti Bandalags íslenskra listamanna, flytur opnunarávarp
14:10 – Edda Austmann, formaður Samtaka tónlistarskóla í Reykjavík
14:20–15:30 – Pallborðsumræður

15:30–16:00 – Spurningar úr sal

Þeir sem hafa boðað komu sína á kosningafundinn:

Arna Magnea Danks, Vinstrið
Björg Magnúsdóttir, Oddviti Viðreisn
Einar Sveinbjörn Guðmundsson, Flokkur fólksins
Einar Þorsteinsson, Framsóknarflokkurinn
Hjördís Dröfn Vilhjálmsdóttir, Góðan daginn framboðið
Hlédís Maren Guðmundsdóttir, Miðflokkurinn
Oktavía Hrund Guðrúnar Jóns, Píratar,
Rúnar Freyr Gíslason, Sjálfstæðisflokkurinn
Silja Sóley Birgisdóttir, Oddviti Sósíalistaflokks Íslands
Skúli Helgason, Samfylkingin